Eigum við ekki aðeins að staldra við?

Eftir bæjarmálafund s.l. mánudag þá hef ég verið að hugsa mikið um orð hans Ásgeirs Magnússonar.  Ásgeir er maður með mikla reynslu úr heimi stjórnmála og atvinnulífs og starfar í dag á Skrifstofu Atvinnulífsins á Akureyri.  Hann nefnir að við eigum að snúa úr vörn í sókn.  Ég er þó ekki að tala um fótbolta heldur um málefni flugvallarins í Vatnsmýrinni og hvernig við Akureyringar getum komið að máli.  Þetta er miklu meira og stærra mál heldur en bara einn flugvöllur.  Þetta er tenging landsbyggðar við stjórnsýsluna í Reykjavík, við lækna og sérfræðinga í Reykjavík, við atvinnulífið vegna stærðar markaðarins og þannig mætti lengi telja.   Er því ekki tilvalið að staldra við og skoða heildarmyndina?  Er Landsspítalanum jafnvel betur settur á öðrum stað þegar flugvöllurinn er farinn úr Vatnsmýrinni?  Eigum við frekar að byggja upp Landsspítala í Keflavík?  Eigum við að setja upp hraðlest KEF - REK?  Því ekki Akureyri - Reykjavík? Það vakna margar spurningar...